МУНИЦИПАЛЬНОЕ БЮДЖЕТНОЕ ОБЩЕОБРАЗОВАТЕЛЬНОЕ УЧРЕЖДЕНИЕ «ШЕМУРШИНСКАЯ СРЕДНЯЯ ОБЩЕОБРАЗОВАТЕЛЬНАЯ ШКОЛА» ШЕМУРШИНСКОГО МУНИЦИПАЛЬНОГО ОКРУГА ЧУВАШСКОЙ РЕСПУБЛИКИ
Версия для слабовидящих
«Чĕрĕ сăмах» конкурс çĕнтерÿçисене саламлатпăр
ЧР Вĕренÿ тата çамрăксен политикин министерствин шкул тулашĕнчи ĕçсен «Эткер» центрĕ пуш тата ака уйăхĕсенче прозăллă хайлавсене чăвашла пăхмасăр илемлĕн калассипе «Чĕрĕ сăмах» конкурс ирттерчĕ. Ăна Чăваш чĕлхи кунне, Сăр тата Хусан хÿтӗлев чиккисене тăвакансен ĕç паттăрлăхне халалланă. Конкурсăн тĕллевĕ – шкул ачисене тăван чĕлхепе литературăна юратма вĕрентесси. Ăмăртăва 5-11 классенче вĕренекен ачасем хутшăнчĕç. Унта вара пурĕ 200 ытла ача тупăшрĕç. Вĕсенчен пирĕн шкулта 5-мĕш класра вĕренекен М.Чураков 5-7 классем хушшинче 1-мĕш вырăн йышăнса çĕнтерÿçĕ пулса тăчĕ ( хатĕрлекенĕ Семенова Л.А.) Вăл чăваш халăхĕн «Улăп паттăр çичĕ пуçлă аçтахапа çапăçать» халапне питĕ хавхаланса та хĕрÿленсе вуларĕ. Çак ушкăнрах 2-мĕш вырăна 6-мĕш класра вĕренекен А.Ёлкина (хатĕрлекенĕ Ухваркина И.П.) çĕнсе илчĕ. Вăл Сăр тата Хусан хÿтӗлев чиккисене тăвакансен пĕр аса илĕвĕпе паллаштарчĕ. Чĕре патне пымаллах янрарĕç ун сăмахĕсем. 8-9 классен хушшинчи тытăçура вара 1-мĕш вырăна 8-мĕш класра вĕренекен А.Павлова (хатĕрлекенĕ Семенова Л.А.) йышăнчĕ. Вăл Трубина Марфи çырнă «Çерçипе шăнкăрч» юмаха тĕлĕнмелле хитре вуласа пачĕ. «Чĕрĕ сăмах» конкурс çĕнтерÿçисене чĕререн саламлатпăр, малашне те çакăн пекех маттур та пултаруллă пулма, чăваш чĕлхине юратса, унпа шăкăл-шăкăл калаçса, тăван халăх ятне çÿлте тытса пурăнмалла пултăр. Çапла пултăр!