Юпа уйăхĕн 25-мĕшĕнче К.В.Иванов ячĕллĕ Чăваш Патшалăх академи драма театрĕн артисчĕсем Шăмăршăна пысăк программăпа килсе çитрĕç. Çак программăпа килĕшÿллĕн пирĕн ентешсем, Светлана Лукианова, Ирина Верьялова, Евгений Урдюков, Чăваш Республикин тава тивĕçлĕ артисчĕсем Николай Сергеев, Александра Зайцева, РСФСР халăх артисчĕ Нина Яковлева, районти чăваш чĕлхипе литературине вĕрентекенсемпе тĕл пулу ирттерчĕç. Тĕл пулура вĕрентекенсемпе артистсем тĕрлĕ ыйту хускатрĕç. Уйрăмах вĕсене чăваш чĕлхин пуласлăхĕ пăшăрхантарчĕ. Юлашки çулсенче çамрăксемпе ачасем тăван чĕлхерен ютшăнни, телевиденипе радиора чăваш передачисем сахалрах пулни пурне те кулянтарать иккен. Хăнасене артист профессине алла илес текенсем сахалланни те хытă шухăшлаттарать.
Тăван чĕлхе пуласлăхне, тăван халăх культурине упраса хăварасси чăваш чĕлхипе литературине вĕрентекенсемпе сцена ăстисен чи пысăк тивĕçĕ тесе пĕтĕмлетрĕç. Хăнасем Шăмăршăна чăвашла çĕнĕ спектакльсемпе татах та килсе çÿреме шантарчĕç.